Муус устар 11 күнүгэр Мындаҕаайыга Чурапчы улууһун оскуолаларын үөрэнээччилэригэр «Сылгыһыт күрэҕэ — 2026» ыытылынна
«Боотур уус сыдьааннара» бырагыраама чэрчитинэн Чурапчы улууһун оскуолаларын хамаандаларын икки ардыларыгар бастакы Социалистическай Үлэ Дьоруойа, аатырбыт сылгыһыт Роман Иннокентьевич Константинов 130 сылыгар анаммыт «Сылгыһыт күрэҕэ 2026» Мындаҕаайыга ыытылынна.
Тэрээһин үөрүүлээх арыллыыта Р.И.Константинов аатынан Амма орто оскуолатын тэлгэһэтигэр Чурапчы оройуонун, Болугур нэһилиэгин, Чурапчы оройуонун Бочуоттаах олохтооҕо, үлэ бэтэрээнэ Николай Григорьевич Михайлов Алгыһынан саҕаланна. Тэрээһин кыттыылаахтарыгар, ыҥырыылаах ыалдьыттарга оскуола устун экскурсияны оскуола бастыҥ үөрэнээччилэрэ Матвеева Лена, Ядрихинская Кира, Моякунова Сардаана оҥордулар, үөрэхтэрин-үлэлэрин туһунан сырдаттылар. Учууталлар Луковцева А.И., Игнатьева Л.Н. тэрийиилэринэн Үлэ Дьоруойугар анаммыт уруһуй быыстапката тардыллан, мустубут дьон сэҥээриитин ылла. Тэрээһин чэрчитинэн Р.И.Константинов пааматынньыгар сибэкки дьөрбөтүн ууруу сиэрэ-туома ыытылынна.
Күрэх кыттыылаахтара Үлэ Дьоруойун аатынан Үлэ уонна кыраайы үөрэтэр түмэлгэ сылдьан, Дьоруой олоҕун-үлэтин, нэһилиэккэ араас кэмнэргэ сылгы иитиитин сайдыытын, араас кэмнээҕи сылгыһыттар тустарынан Попова М.П. сиһилии кэпсээнин астына иһиттилэр, экспонаттары көрдүлэр.
Сүрдээх интириэһинэй, бэрт илин-кэлин түсүһүүлээх эдэр сылгыһыттар күрэхтэрин Мындаҕаайы бэтэрээн сылгыһыттара Кожуров И.И., Павлов С.В., Гермогенов К.М., Саввин И.И., Кузьмин И.А. сыаналаатылар.
Күрэх бастакы «Дьөһөгөй» викторинатыгар Амма орто оскуолатын үөрэнээччитэ Петров Аман кыайыылааҕынан таҕыста, тоҥуу хаарынан сүүрүүгэ Иннокентьев Слава бастакы миэстэни ылла, сылгыны ыҥыырдаан, сыарҕалаан сүүрдүүгэ нэһилиэкпит биир бастыҥ сылгыһыта Кожуров И.И. капитаннаах Амма орто оскуолатын 3-с хамаандата кыайыыны сурунна.
Кылаан Кыайыылааҕынан саамай үрдүк баалы ылан, эмиэ бу хамаанда ааттанан , нэһилиэк сылгыһыттарын түмсүүтэ туруорбут 16 000 с. уу харчынан бирииһин тутта.
Тэрээһин кыттыылаахтарыгар, көрөөччүлэргэ анаан сылаас астаах-үөллээх хонуу куукуната, буруолаабытынан минньигэс шашлык тардылынна.
