Муус устар 4 күнүгэр Мындаҕаайыга Кыһыны атаарыы…
Чурапчы улууһун Болугур нэһилиэгин олохтоохторо, ыалдьыттара бэртээхэй бэлиэ күнү атаардылар.
Күнүс 11.00. ч саҕаламмыт тэрээһиҥҥэ нэһилиэк түөлбэлэрэ бэрт көхтөөхтүк кытыннылар.
«Сардаҥа», «Сарыал», «Бэс», «Төрүт» түөлбэлэр ийэлэрэ, эбэлэрэ санааларын ууран, оҥостон — тэринэн кэлэн, Россияҕа Сомоҕолоһуу сылыгар анаммыт араас омуктар Чэй иһиилэрин үгэстэрин көрдөрбүттэрэ, кэпсээбиттэрэ мустубут дьону олус сэҥээртэ. Бу күрэх СР Култуура сылыгар анаммыт эҕэрдэ нүөмэрдэри көрүү түһүмэҕэ бэрт сэргэхтик ааста. Түмүккэ Дьүүллүүр сүбэ быһаарыытынан саамай үгүс баалы ылбыт «Бэс» түөлбэтэ кыайыылааҕынан таҕыста.
Мындаҕаайыбыт саамай кырачаан олохтоохторугар анаммыт Колясканы киэргэтии күрэҕэр элбэх оҕолоох эдэр ыал Анна уонна Афанасий Петровтар бастаатылар.
Оскуола оҕолоругар «Друг мой Снеговик, до следующей зимы!» — диэн хаар киһини оҥоруу күрэҕэр «Төрүт» түөлбэ уолаттарын түмсүүлээх хамаандата инники таҕыста..
Нэһилиэкпит эдэр ыччатыгар анаммыт, спорт инструктор Денис Третьяков тэрийбит сүрдээх интириэһинэй түһүмэхтэрдээх саамай тиритиилээх-хорутуулаах, ыһыылаах-хаһыылаах спортивнай күрэҕэр 3 хамаанда илин-кэлин түһүстүлэр, бу күрэххэ Афанасий Петров капитаннаах «Дохсун» хамаанда кыайыылааҕынан таҕыста.
Нэһилиэкпит саамай көхтөөх дьоно-сэргэтэ оҕотуттан аҕа көлүөнэтигэр тиийэ, Сандал Саас кэлбитин уруйдуур бэлиэ күҥҥэ үөрэ-көтө мустан, кулууп үлэһиттэрэ астаабыт минньигэс шашлыктарын, сып-сылаас пловтарын сиэн, бастыҥ асчыппыт Анна Константиновна Фомина астаабыт аһыттан, түөлбэлэртэн араас омук бүлүүдэлэриттэн амсайан, тэрээһиҥҥэ көхтөөхтүк кыттан, үөрэн-көтөн, астынан тарҕастылар.
Бэлиэ күнү түмүктүүр түһүмэҕинэн Мындаҕаайы НАДЬ кинозалыгар Нон-стоп киинэ киэһэтэ буолла.
«Төрүт» түөлбэ. Кытай омук чэй иһиитин церемонията.
«ТӨРҮТ» түөлбэ түмсүүлээх хаһаайкалара Кытай омук чэй иһиитин үгэстэрин көрдөрдүлэр.
«Бэс» түөлбэтэ бэртээхэй тэринэн кэлэн Нуучча омук чэй иһиитин үгэстэрин көмүскээтэ.
«Сарыал» түөлбэ. Узбек омуктар чэй иһиилэрэ.
«САРДАҤА» түөлбэ сахалар эҥинэ бэйэлээх отторуттан иҥэмтэлээх чэй туһунан кэпсээтилэр.
«БЭС» түөлбэтэ чэй иһиитин церемониятыгар 1-кы миэстэни ылан, Кыайыылааҕынан таҕыста
«САРДАҤА» түөлбэ 2-с миэстэни ылла.
«ТӨРҮТ» түөлбэ 3-с миэстэ буолла
«САРЫАЛ» түөлбэ көхтөөх кыттыытын иһин поощрительнай бириис тутта
Снеговик оҥоруутугар бастаабыт «Төрүт» түөлбэ көрдөөх-көхтөөх уолаттар.
