Аллараа Бэстээххэ Чурапчы ВИА-ларын кэтэһиилээх кэнсиэрэ
Олунньу 19 күнүгэр Аллараа Бэстээх бөһүөлэгэр В.В.Местников аатынан Культурнай сайдыы киинигэр билиҥҥи кэмҥэ сэдэх, олус сэргэх ВИА кэнсиэрэ тыыннаах музыканы сэҥээрээччилэри түмтэ.
Мындаҕаайыттан, 70-с сылларга айылҕаттан айдарыылаах музыкант, баянист Руслан Соловьев тэрийэн хаалларбыт «Үргэл» бөлөҕө баран, тыыннаах музыка түһүлгэтигэр кыттан, биир интириэстээхтэрин көрсөн, кэпсэтэн-ипсэтэн, атын бөлөхтөрү кытта санаа, уопут атастаһан, астынан, үөрэн, сэргэх сырыыны сылдьан кэллэ.
Бөлөх салайааччыта. соло-гитарист Янгвард Афанасьевич Ефимов, бөлөх саамай өр оонньообут уопуттаах музыканнара Андрей Андреевич Ильин бас-гитараҕа, Василий Николаевич Кожуров ударнайга оонньоотулар.
Болугур нэһилиэгин «Үргэл» ВИА-тын салайааччыта Янгвард Ефимов бөлөҕөр эдэр дьону тардара олус кэскиллээх, ыччаты тыыннаах музыкаҕа угуйара хайҕаллаах.
Ол курдук, Алина Игнатьева ритм-гитараҕа, Егор Федоров клавишнайга оонньоон, Чурапчы
ВИА-ларын улахан түһүлгэтигэр кыттан, атын бөлөхтөр хайдах оонньуулларын, ыллыылларын көрөн-истэн, уопут ылан кэллилэр.
